بصراحة ما كنت ناوي أرجع أكتب عن أبو حسين بعد التدوينة الأولى بس ضميري ما سمحلي ... و العادات و الأصول شدتني و زي ما استقبلنا أبو حسين صار لازم نودعه .... أنا عارف انه الكلمات ما بتعبر و انه الوداع صعب بس في كمن كلمة لازم تسمعهن قبل ما تنصرف .... 1- ثلاث ترباع الحكي اللي بنحكى عنك انت بريء منه ... يعني بشرفك انت شو دخلك في أزمة قلنديا ؟؟؟ شو دخلك في اللحمة الخربانة و حلويات الاولاد الصغار اللي معفنة ؟؟؟ انت مثلا مسؤول عن عن قانون الضريبة تبعنا ؟؟؟؟ طيب عمرك ضغطت على واحد من شعب دولة فلسطين يوخذ قرض سيارة و قرض دار وبعديها يدور يشحد في الشوارع؟؟؟ طيب بلاش... بحياة بناتك انت اللي طفحتلنا البلد" أن جي أوز" و سهلتلنا القروض و بعت البلد للبنك؟؟ 2- زي ما حكيتلك من قبل انت مش أكبر مشاكلنا و لا خوازيقنا ... و الله انت بجوز بتيجي الخازوق رقم 86 في الترتيب التصاعدي لخوازيق مواطني دولة فلسطين .... بس الناس أحيانا بتحب تهول الاشي و بجوز أغلب الناس بتسب و تحكي من باب الحسد مش أكثر!! لذلك دونت كير أبوحسين !! 3- ركز معي شوي أبوحسين ... أنا مش اني مش طايقك أو بكرهك أو خاطري أرفش في بطنك لاشي شخصي ... لا والله ... بس يعني طالما جاي في الطيارة ع رام الله ليييش كل هالتسكيرات و المربعات و المثلثات الأمنية ... و بعدين وين العدل انه جماعة الارسال و البالوع يعطلو و احنا هون في سطح مرحبا نداوم ؟؟؟ المرة الجاي يا بتحكولنا نطلع كلنا من رام الله يا بتقعدوا في محل ثاني و الكل بروح على شغله!! 4 - تزعلش مني.. بس اللي بتسوييه عيب .... كون الرام فيها كثير مجاري و نفايات صلبة لا يعني انه فيها نفط .. انا بصراحة سمعت انك حاطط عينك ع الرام ... شوف من الآخر أي محاولة مساس باستقلالية الرام ستواجه بمقاومة شرسة ... بدك الرام هي الانتخابات و الصناديق و رئاسة البلدية مفتوحة للجميع 5- أبوحسين اللي مفهمك انه احنا محتاجينكم تحللولنا مشاكلنا واحد قليل ترباية .... احنا والله لو تحملوا همنا غير أمريكا تنهار ... يا أخي هو فش غيرنا في الدنيا انتو دشرونا مشااان الله و احنا بنحل مشاكلنا لحالنا! ... بس بشرفك قبل ما تدشرونا لحالنا بدي منك توصللي هالكم غرض لابن عمي في شيكاغو و بالمرة تحملله كروزين دخان من المنطقة الحرة وانت راجع ... بعد هيك خلص دشرونا في حالنا. 6 - في نقطة جوهرية طرحتها في المؤتمر الصحفي اليوم .. النقطة تبعت المرأة الفلسطينية الريادية التي تحاول فتح محلات للترفيه عن الشباب الفلسطيني ... في الحقيقة وردني كثير تساؤلات عن هاي النقطة أهمها ... شو قصدك بالزبط؟؟ و وين هدول المحلات ؟؟ 7- تآخذنيش في هالكلمة ... بس انت واحد قليل أصل ... يعني احنا و انتو (الأمريكيين من أصل أفريقي) تعرضنا لأبشع أنواع العنصرية و التمييز في التاريخ المعاصر ... وانت بتعرف شو يعني الظلم و القهر و الاضطهاد و موقفك انت و بلدك أبعد ما يكون عن الشرف .... فلا تزعل مني لما أستقبلك بقلة هلا و أودعك ب مع القلعة!! أبوك يا سيد أوباما لما أجا على أمريكا قبل 100 سنة انسان بسيط مسكين ما كان يحلم انه ابنه راح يصير رئيس أقوى دولة في العالم قصتك يا سيدي كثير حلوة و ملهمة.... أمام التاريخ و أمام الله كان بامكانك تكون انسان استثنائي ... لكن للأسف انت اللي رفضت و وقفت في الجانب الخطأ ... انت انسان ذكي و انت في داخلك عارف و متأكد العدل وين و الظلم وين و مع ذلك تصر على نفس المهزلة الأممية بحق هالشعب المطحون .... لذلك يا سيد أوباما أمام التاريخ و أمام الله ستكون ... لا شيء! و مع القلعة !!!