غريبة جداً كمية الاستهتار بهالبلد وناسها, مش مفهوم ابداً طريقة التعامل مع الناس الي بتدفع فاتورة عالية من دمها وعمرها عشان البلد تكون بخير, بالمقابل بتلاقي تعامل غير مفهوم مع الناس وارزاقها ومستقبلها قرارات بقانون تصدر وتلغى وتمدد اضراب نقابات مستمر من نقابة لنقابة رواتب غير كاملة , ارتفاع بالاسعار واستهتار بحياة الناس ومستقبلها.
الي بدو يقنع العامل الي من قبل الفجر واحنا نايمين بطلع يتشنطط على الحواجز علشان لقمة اولاده انه يحول الراتب على البنك بدو يعطي كل الضمانات انه ولا فلس رح ينسرق من تعبه وانه مش رح يدفع ولا فلس عمولات هون وهون من الفلوس الي ثمنها تعب وعرق وسنوات كثيرة من عمر اطفاله الي بكبرو وهو مش بينهم عشان يعيشهم بكرامة.
عمي للمرة المليون الي مش قادر يحمل ويشيل هالبلد الي دفعنا ثمنها من دمنا واعمارنا يروح يشوفله شغله تانيه او بالعامية "ينصرف" ...
هاي البلد الى اولادنا بموتو عشانها مليانه خبرات ومليانه ناس قادرة على ادارة هالبلد بس ما شاء الله عنا وزراء وقيادات صارلهم من قبل الاسلام على كراسيهم , ما في حدا قادر يدير هالبلد غيرهم ...
مش رح يتغير حال هالبلد لحتى تتغير هالوجوه الي شاخت وهي على كراسيها بتستنى بمليون جديد يزيد برصيدها او منصب جديد يورثه لابنه او وكالة جديدة يسلمها لعائلته.
حرام هالبلد الي دفعنا ثمنها كثييير من دمنا ومن اعمارنا في السجون هيك يصير فيها ... للامانة حال هالبلد بقهر بقهر بقهر.
